ནམ་ཡང་བརྗེད་དཀའ་བའི་བཤེས་གཉེན།
རྒན་ལགས། ཁྱེད་ནི། ལོང་བར་མིག་འབྱེད་ཅིང་། ལྐུགས་པར་སྨྲ་ལྕེ་སྦྱིན་པ། རྣམ་དཔྱོད་ཀྱི་བློ་མིག་བསྩལ་མཁན་གྱི་ཤེས་རབ་ཀྱི་དཔའ་བོ། སྤྱི་ཚོགས་འདིའི་མི་གཤིས་བཟང་པོ་བསྐྲུན་པའི་ཨར་ལས་པ་ཞིག བཟང་སྤྱོད་ཀྱི་འབྲས་བུ་བྱུར་དུ་སྨིན་པར་བྱེད་པའི་ས་བོན་དང་། རིན་ཐང་ཡོད་ཚད་ས་འོག་ཏུ་ཡིབ་ཀྱང་འོད་དུ་འཚེར་བའི་གསེར་བཙོ་མ་དེ་ཡིན། ཁྱེད་ཀྱིས་རང་ཉིད་ཀྱི་སྤྱི་ཚོགས་གནས་བབ་ལ་མ་ལྟོས་པ་དང་། ལེགས་སྐྱེས་ཇི་ཙམ་ཆེ་ཡང་སྣང་མེད་དུ་གཏོང་བའི་དོན་དངོས་ལ་འཛེམས་བག་ཅི་ཡང་མེད་པར་ལང་ཚོ་ཀློག་དང་བསྡོངས་ཤིང་། སྒོ་སམ་ཐོག་བྲིས་ལ། ཅ་ཅོ་དང་འགྲོགས་ནས་ཁུ་སིམ་མེར། འུར་ཟིང་ངེར་སྣང་མེད་དུ་འཛད་ཡོད། ཁྱེད་ཀྱིས། རང་ཉིད་ཀྱི་ལང་ཚོ་སྦྱོང་ཚན་དང་བྲེལ་ཞིང་། གྲབས་ཁྲིད་ཀྱིས་བསུས་ལ། ཡིག་རྒྱུགས་དང་བསྒྲུན་ནས་ལྷིང་ཆགས་གེར། བྲེལ་འཚུབ་བེར་ཡང་སྣང་བ་སྣང་མེད་དུ་འཛད་ཡོད། ཁྱེད་ཉིད་ལས་གནས་དེའི་ཐོག་སླེབས་པ་ནས་བཟུང་། ཁྲིད་སྟེགས་གྲུ་བཞི་དེ་མི་ཚེའི་གར་སྟེགས་ཆེ་ཤོས་དེ་ཡིན་ལ། ཡིག་རྨོངས་པ་དང། ཤེས་རྨོངས་པ་དེ་དག་ནི་ཁྱེད་ཀྱི་བུ་ཕྲུག་དང་གྲོགས་པོ། ཉིན་མཚན་དབྱེར་མེད་དུ་དྲན་པའི་ཡོལ་བའི་སྣང་བ་དེ་ཡིན། ཁྱེད་ཀྱིས་རང་ཉིད་ནི་གར་སྟེགས་དེའི་ཐོག་གི་འཁྲབ་སྟོན་པ་གཅིག་པུ་དེར་བརྫུས་ཤིང་། ལྟད་མོ་བ་གྲངས་མེད་ལ་དགོད་བཞིན་ངུ་བཞིན་རིག་གནས་ཀྱི་གོ་ཆ་སྤྲས་མྱོང་ལ། མང་པོ་ཞིག་ལ་ཕུགས་བསམ་གྱི་དམིགས་པ་བསྐྲུན་ཞིང་། ཡང་མང་པོ་ཞིག་གི་མི་ཚེའི་རིན་ཐང་རྫོགས་པར་མངོན་པར་བྱས་ཡོད།
དེ་རིང་ཁོ་བོས་ཁྱེད་ཀྱི་ལང་ཚོ་ཉི་མར་རྒྱན་འདོད་ལ། ཁྱེད་ཀྱི་ལང་ཚོ། ཟླ་བ། སྐར་མ། ཆུ་བོ། གངས་རི། སྒྲོན་མེ། རིན་ཆེན་གླིང་སོགས་ཉམས་ཆུང་ལ་མཛེས་ཤིང་སྡུག་པའི་སྣང་བ་ཅི་རིག་ལ་རྒྱན་འདོད། དེ་རིང་ཁོ་བོས་ཁྱེད་ཀྱི་ལང་ཚོ་དེ་སློབ་མ་ཚོའི་ཁོང་པའི་ནང་དུ་ལྡིང་བཞིན་པའི་སྙིང་གསོན་པོ་དེར་དེ་བས་རྒྱན་འདོད། དེ་རིང་ཡང་སྤྱི་ཚོགས་འདིས་ཁྱེད་ཀྱི་ལེགས་སྐྱེས་ལམ་ཙམ་དྲན་པའི་ཉིན་མོ་གཅིག་པོ་དེ་ཡིན། རྒན་ལགས། ཁྱེད་ནི་ངའི་སེམས་ཁོང་ན་བཞད་པའི་ཉི་མ་དམར་པོ་དེ་ཡིན།
༢༠༢༠ ལོའི་སློབ་ཐོན་འཛིན་གྲྭ ༩ པའི་སློབ་མ་སྤེན་ཆུང་ནས།