སྤྱི་ལོ༢༠༢༡ལོའི་ཟླ༡༠ཚེས༡༥ཉིན་གྱི་ཞོགས་པའི་ཆུ་ཚོད་དང་པོའི་གཡས་གཡོན་ཙམ་ཞིག་ལ། ངམ་རིང་རྫོང་སློབ་འབྲིང་གི་ངམ་རིང་རྫོང་སློབ་འབྲིང་གི་ཧྲུའུ་ཅི་དང་སློབ་སྤྱི། དེ་བཞིན་འབྲིང་རིམ་འགོ་ཁྲིད་ལས་བྱེད་པ་བཅས་ཀྱིས་ལས་གནས་བརྗེ་རེས་སུ་ཕེབས་པའི་རྒན་ལགས་གསུམ་པོ་རྣམས་སྐྱེལ་མ་དང་སྦྲགས་རང་སློབ་འབྲིང་དུ་གཟིགས་སྐོར་དང་ཉམས་མྱོང་སྤེལ་རེས་སུ་ཕེབས་འབྱོར་གནང་བས། རང་སློབ་གྲྭའི་འགོ་ཁྲིད་རྣམས་ཀྱིས་ཕེབས་བསུ་ཞུས་ཤིང་མཛའ་བརྩེའི་འཚམས་འདྲི་ཡང་གནང་སོང་།
ལས་གནས་བརྗེ་རེས་སུ་ཕེབས་གནང་བའི་རྒན་ལགས་གསུམ་པོའི་ཉལ་ཁང་སྔོན་ཚུད་ནས་གྲ་སྒྲིག་བྱས་ཡོད་པ་རྣམས་བཀོད་སྒྲིག་ལམ་ཙམ་བྱས་རྗེས་སུ། ངམ་རིང་སློབ་འབྲིང་ནས་ཕེབས་པའི་རྒན་ལགས་རྣམ་པ་དང་། རང་སློབ་གྲྭའི་འབྲིང་རིམ་ལས་བྱེད་མི་སྣ་སྐོང་སྟེ་ཏང་ཡོན་བྱེད་སྒོའི་ལྟེ་གནས་སུ་ཚོགས་འདུ་སྐོང་ཚོགས་གནང་ཞིང་། ཚོགས་འདུ་ཧྲིལ་པོ་སློབ་སྤྱི་བུ་ཆུང་ལགས་ནས་གཙོ་སྐྱོང་གནང་ཞིང་། དང་ཐོག་ངམ་རིང་རྫོང་སློབ་འབྲིང་གི་ཧྲུའུ་ཅི་ཡང་ལགས་ནས་ལས་གནས་བརྗེ་རེས་སུ་ཕེབས་གནང་བའི་རྒན་ལགས་གསུམ་པོ་ངོ་སྤྲོད་མདོར་བསྡུས་གནང་བའི་རྗེས་སུ་རང་སློབ་གྲྭའི་སློབ་སྤྱི་གཞོན་པ་ཟླ་རྒྱལ་ལགས་ནས་ཕེབས་བསུའི་ཤིས་ཚིག་སྒྲོན་པ། དེ་ནས་རིམ་པ་བཞིན་སློབ་སྟོན་ཀྲུའུ་རེན་པ་རྒོད་ལགས་ནས་ཁོང་གསུམ་ལ་ལས་འགན་དང་བསླབ་ཚན་བཀོད་སྒྲིག་གནང་བ། སློབ་དཔྱོད་ཁང་གི་ཀྲུའུ་རེན་མིང་རྒྱལ་ལགས་ནས་ཁོང་གསུམ་ལ་ཁ་གཏད་རོགས་ཁྲིད་ཀྱི་དགེ་རྒན་རེ་འོས་སྦྱོར་གནང་བ། མཇུག་ཏུ་ལས་གནས་བརྗེ་རེས་ཀྱི་སྣེ་ཁྲིད་པ་ངམ་རིང་རྫོང་སློབ་འབྲིང་གི་སློབ་སྤྱི་ཟླ་བ་བཀྲ་ཤིས་ལགས་ནས་མཇུག་སྒྲིལ་གསུང་བཤད་གནང་ཟིན་པའི་རྗེས། རང་སློབ་གྲྭའི་སློབ་སྤྱི་ནས་གཙོས་པའི་དབུ་ཁྲིད་རྣམ་པས་ཁོང་གསུམ་ལ་བཀྲ་ཤིས་མཇལ་དར་སྒྲོན་གནང་མཛད་པ་དང་སྦྲགས། ལས་ཐོག་ལག་ཁྱེར་དང་། སློབ་གྲྭའི་རྟགས་མ་སྤྲོད་གནང་མཛད་དེ་མཉམ་པར་ཡང་སྒྲོན་གནང་མཛད་སོང་།
དུས་ཡུན་ཆུ་ཚོད་གཅིག་ཙམ་ཚོགས་འདུ་སྐོང་འཚོགས་བྱས་པ་ལས། ལས་གནས་བརྗེ་རེས་སུ་ཕེབས་པའི་རྒན་ལགས་རྣམ་གསུམ་གྱི་ཐུགས་དགོངས་སུ་ས་སྐྱ་སློབ་འབྲིང་གི་དབུ་ཁྲིད་ཀྱི་ཁ་ཞེ་གཉིས་མེད་དང་། མཛའ་བརྩེའི་ཐུགས་ཁུར་དང་། ཞི་མཐུན་མཉམ་གནས། མཐུན་སྒྲིལ་རོགས་རེས་བཅས་ཀྱི་བླ་མེད་རྣམ་པར་དག་པའི་ལྷག་བསམ་དེ་འཆར་ནས། སེམས་ཀྱི་ཞིང་སའི་ངོས་སུ་སྤྲོ་དགའི་དྲོད་གཤེར་འཕེལ་བར་བྱེད་ཅིང་། སྤྱིར་ན་ལོ་གཅིག་གི་དུས་ཚོད་དེ་ཐུང་ཐུང་ཞིག་ཡིན་ཡང་། བགྲང་བྱ་གཅིག་གི་དུས་ཚོད་ནང་ལས་དོན་གྱི་གྲུབ་འབྲས་ནི་ཕྱོགས་གཉིས་ཀྱི་སློབ་གྲྭའི་མཚན་སྙན་དང་། ལ་རྒྱ། ལེགས་ཉེས། རྒྱལ་ཕམ་བཅས་དང་ཡོངས་སུ་འབྲེལ་བ་ངང་ངམ་ཤུགས་སུ་སྐྱེད་པར་བྱས་པས། ལས་གནས་སྤེལ་རེས་ཀྱི་དུས་ཚོད་ནང་བརྩོན་པ་ཆེར་སྐྱེད་ཀྱིས་སློབ་གསོ་སློབ་ཁྲིད་ཀྱི་བགྱི་བ་ལྷུར་ལེན་བྱེད་པའི་དམ་བཅའ་བརྟན་པོར་འཇོག་རྒྱུའི་རྣམ་པ་དེ་ཁོང་གསུམ་པའི་བཞིན་མདངས་ལས་ཡོངས་སུ་མངོན་པར་བྱེད་ཀྱི་འདུག